რატომ ვიცავთ სახეობებს?
დაკვირვებული მკითხველი შეამჩნევდა, რომ ჩვენს ჟურნალში წარმოდგენილი ძირითადი სფეროების გარდა, National Geographic-ი ყოველ წელს გამოყოფს რომელიმე ერთ აქტუალურ საკითხს და ცდილობს, ამ თემას ყველა ნომერში მიუძღვნას სტატია.
გასული პერიოდი საკვებს ეთმობოდა. 2016 კი დაცული ტერიტორიებისა და ბიომრავალფეროვნების წელი იქნება!
ცხადია, ეს არ ნიშნავს,
რომ ტრადიციულ მიმართულებებზე (მეცნიერება, კულტურები, გეოპოლიტიკა და სხვა) უარს ვიტყვით,
მაგრამ შევეცდებით, ყველა მომდევნო ნომერში, სხვადა
სხვა ქვეყნისა თუ საქართველოს “ბუნებაში შევიჭრათ”
და „უღრანი გულიდან” დავინახოთ მსოფლიოც და ჩვენი ქვეყანაც.
ტრადიციულად, იშვიათად ვწერ სტატიებს ჩვენი ჟურნალისთვის. ამას თავისი მიზეზი აქვს; უპრიანია, როდესაც ბურთი და მოედანი პროფესიონალ ჟურნალისტებს ეკუთვნით და არა რედაქტორს. ეს ნომერი იშვიათი გამონაკლისია, რადგან ჩემს სტატიაში „იშვიათი საქართველო” ვცდილობ თავი მოვუყარო ყველა იმ ძირითად საკითხს, რომელთა გაშლასაც მთელი წლის განმავლობაში ვეცდებით და რომლებსაც ჩვენი ჟურნალისტები და ფოტოგრაფები მოგვიმზადებენ.
რატომ უნდა დავიცვათ სახეობები? რა მნიშვნელობა აქვს ბიომრავალფეროვნებას? როგორ ვიცავთ მას? არის თუ არა დაცული ტერიტორიები ველურ სახეობათა დაცვის ერთადერთი საშუალება? მართლაც ასეთი უნიკალურია საქართველოს ბუნება, თუ აქაც „ქართულად” ვაჭარბებთ, მიუხედავად იმისა, რომ ამ ქვეყნის ბუნების უნიკალურობაში ჩვენ, ქართველებს, როგორც ხალხსა და კულტურას, არავითარი წვლილი მიგვიძღვის?
იმედი მაქვს, მთელი მიმდინარე წლის განმავლობაში, ბევრ ახალს შევიტყობთ და ბევრ საინტერესო თუ საჭირბოროტო საკითხს მოვიცავთ.
ვსარგებლობ შემთხვევით, ყველას გილოცავთ ახალ წელს და ისეთ სიჯანსაღეს გისურვებთ, როგორიც ხელუხლებელ ჰარმონიულ ეკოსისტემებს ახასიათებთ ხოლმე!