დედამიწის მოსახლეობა

უკანასკნელი მონაცემებით, საქართველოს მოსახლეობა 3,7 მილიონ ადამიანს შეადგენს. ცოტა ხნის წინ გავაცნობიერე, რომ გონებაში გამჯდარი ფრაზა „საქართველო 5-მილიონიანი ქვეყანაა“, სამწუხაროდ, სიმართლეს დიდი ხანია აღარ შეესაბამება; ამას მრავალი მიზეზი აქვს, ყველაზე მნიშვნელოვანი კი უარყოფითი მიგრაციული სალდოა. იმ პერიოდში, როდესაც ზემოხსენებული ფრაზა ჭეშმარიტებასთან ახლოს იყო, დედამიწაზე 6 მილიარდი ადამიანი ცხოვრობდა. გუშინდელი დღესავით მახსოვს ის ცნობაც, რომ 7 მილიარდს მივაღწიეთ (12 წელი გასულა). შარშან ნოემბერში უკვე 8 მილიარდს გადავაბიჯეთ. საქართველოში მცხოვრები ქალის სიცოცხლის მოსალოდნელი ხანგრძლივობის გათვალისწინებით, 9 მილიარდზე მეტ დედამიწელსაც მოვესწრები საუკუნის მეორე ნახევარში. დღეს განსაკუთრებით მიჭირს წარმოდგენა, როგორი დემოგრაფიული სურათი იქნება იმ პერიოდის საქართველოში, თუმცა პლანეტის დემოგრაფიული სურათის საკმაოდ მკაფიო პროგნოზს ამ ნომერზე მუშაობის დროს გავეცანი.

სანამ ვარსკვლავთშორისი მიგრაცია დედამიწის მოსახლეობის დინამიკაზე არ აისახება, მკვლევრები შობადობის და სიკვდილიანობის მაჩვენებლებით ხელმძღვანელობენ გლობალური დემოგრაფიული სურათის შესადგენად. აპრილის ნომერში ორი ქვეყნის – ნიგერიისა და ჩინეთის – მაგალითზე მიმოვიხილავთ რეგიონულ განსხვავებებს, ურთიერთსაწინააღმდეგო ტენდენციებსა თუ სხვა ნიუანსებს, რომლებიც მსოფლიო პოპულაციის ზრდის მიღმა იმალება. ერთისთვის მოსახლეობის ზრდაა გამოწვევა, მეორისთვის – შემცირება.  

ამავე ნომრის სხვა სტატიებით შეგახსენებთ, რომ მარტო ჩვენ არ ვართ დედამიწელები. ადამიანები მრავალფეროვან ცოცხალ ბუნებასთან ერთად ვცხოვრობთ პლანეტაზე, რომელსაც მოფრთხილება სჭირდება. 

წინ საინტერესო საკითხავი გელით.