როგორ მოქმედებს ვირუსი ცხოველებზე

COVID-19-ის შედეგად ცხოველთა დაღუპვის შემთხვევები იშვიათია. ინფიცირებულ ცხოველთა სახეობები სულ თითებზე ჩამოსათვლელია: ლომი, ვეფხვი, შინაური კატა, ძაღლი და წაულა. შინაურ ცხოველებს ვირუსი პატრონებისგან გადაედებოდათ; გარეულ კატებს – ალბათ, უსიმპტომო მომვლელისგან; წაულას კი – ბეწვეულის ფერმაში დასაქმებულებისგან, ან სულაც სხვა ინფიცირებული ცხოველებისაგან.

კორნელის უნივერსიტეტის ცხოველთა ჯანმრთელობის დიაგნოსტიკის ცენტრის ვირუსოლოგ დიეგო დიელის სიტყვებით, ეს ვირუსი ზოონოზურია – ცხოველებისგან ვრცელდება – მაგრამ არსებითად ადამიანურ დაავადებას იწვევს. ადამიანის მიერ ვირუსის გავრცელება ცხოველთა ჯანმრთელობას არსებით საფრთხეს რომ უქმნიდეს, უკვე გვეცოდინებოდა.

კიდევ უამრავი რამ არის უცნობი. არ დასტურდება ვირუსის შინაური ცხოველისაგან ადამიანზე გადაცემის შემთხვევები, თუმცა ცხოველების ფართომასშტაბიანი ტესტირება არც ჩატარებულა. „რესპირატორული სიმპტომების მქონე ყველა ცხოველი უნდა შევამოწმოთ? 12 თვეში შეიძლება ასეც მოვიქცეთ“, – ამბობს პენსილვანიის უნივერსიტეტის ვეტერინარული მედიცინის სკოლის მიკრობიოლოგი შელი რანკინი. „აქამდე მხოლოდ იმ შემთხვევაში ვამოწმებდით, თუ ადამიანის ჯანმრთელობასთან იყო უშუალოდ დაკავშირებული“.

მხოლოდ ექსპერიმენტული ინ-ვივო კვლევებით შეიძლება დადგენა, რამდენად ექვემდებარება ესა თუ ის სახეობა ამ ვირუსით ინფიცირებას.