საქართველოს უძველესი ნაკრძალი

საქართველოს უკიდურეს ჩრდილო-აღმოსავლეთ ნაწილში, კავკასიონის სამხრეთ ფერდობზე მდებარეობს ლაგოდეხის დაცული ტერიტორიები, რომლებიც გამორჩეულია ველური ბუნების მრავალფეროვნებითა თუ სილამაზით და რომელსაც დაცული ტერიტორიის სტატუსი ჯერ კიდევ 1912 წელს მიენიჭა. ეს თარიღი მას კიდევ ერთ პრივილეგიას სძენს – ის უძველესი დაცული ტერიტორიაა კავკასიაში. თავდაპირველად, დაცული ტერიტორიის ფართობი 3000 ჰექტარი იყო, დღეს ლაგოდეხის დაცული ტერიტორიები მოიცავს ლაგოდეხის სახელმწიფო ნაკრძალს (19755 ჰა) და აღკვეთილს (4500 ჰა).

ლაგოდეხის დაცულ ტერიტორიებს აღმოსავლეთით, აზერბაიჯანის მხარეს, ზაქათალის ნაკრძალი ესაზღვრება, ჩრდილოეთით კი – ტლიარატინსკის აღკვეთილი, დაღესტანში, რაც, საბოლოო ჯამში, კავკასიაში ყველაზე დიდ დაცულ ტერიტორიას ქმნის და, ამდენად, მისი მნიშვნელობა ეკოლოგიური თვალსაზრისით განუზომელია. ბუნების დაცვის მსოფლიო ფონდმა (WWF) ლაგოდეხის დაცული ტერიტორიები ერთ-ერთ უმნიშვნელოვანეს გლობალურ ეკორეგიონად აღიარა. ის ასევე აღიარებულია „ზურმუხტის ქსელის” პოტენციურ კანდიდატად და საქართველოსა და ევროკავშირს შორის ასოცირების შეთანხმების ფარგლებში კვალიფიცირდება Natura 2000-ისთვის.

უფრო დაწვრილებით ლაგოდეხის ნაკრძალის ისტორიის, მისი მნიშვნელობის, მიმდინარე სამეცნიერო-საკონსერვაციო სამუშაოების, ახალი ტურისტული კონცეფციისა და იმ პრობლემების შესახებ, რომლებსაც მომეტებული ბრაკონიერობა ქმნის, ჩვენი ავტორი, სოფო აფციაური მოგითხრობთ; ნიკა ქერდიყოშვილი, ნიკა პაპოშვილი და ირა კურმაევა კი წარმოგიდგენენ ფოტოებს ლაგოდეხის გასაოცარი ბუნებისა, რომელსაც გაფრთხილება და პასუხისმგებლობით მოპყრობა სჭირდება.

გმადლობთ, რომ კითხულობთ National Geographic საქართველოს.