საუზმე ჭომაში

აკაკი წერეთლის მოგზაურობა რაჭა-ლეჩხუმში 1912 წლის 21 ივლისს ქუთაისის სასტუმრო „გრანდ ოტელიდან“ 07:00 საათზე დაიწყო. პოეტისა და მისი თანამგზავრების პირველი მასპინძელი ქუთაისის გარეუბანში, ჭომაში, სპირიდონ წერეთელი იყო. ეს ფოტო ამ მასპინძლობის ამბავს გვიყვება.

„ქუთაისში მცხოვრებ რაჭველებს გაემართათ იუბილარისათვის გზის დასალოცი საუზმე, რომელმაც ზეიმის ხასიათი მიიღო. ზურნაზე საგანგებოდ ითამაშეს ძმებმა გალაკტიონ და ალექსანდრე კირვალიძეებმა“, – წერს ვასილ ამაშუკელი თავის მოგონებებში, რომელსაც ეროვნული არქივი ინახავს.

რაჭა-ლეჩხუმში აკაკი წერეთლის მოგზაურობიდან 105 წელი გავიდა. საყვარელი პოეტის სტუმრობა ადგილობრივმა მოსახლეობამ დღესასწაულად აქცია. ეს ისტორია კინოფირზე ოპერატორმა ვასილ ამაშუკელმა აღბეჭდა, ფოტოები კი კოტე ქავთარაძემ გადაიღო. „აკაკი წერეთლის მოგზაურობა რაჭა-ლეჩხუმში“ პირველი ქართული სრულმეტრაჟიანი დოკუმენტური ფილმია.