შემთხვევითი შეხვედრა

დევიდ დუბილე: დედოფლის ბაღების ეროვნული პარკი საზღვაო დაცული ტერიტორიაა, რომელიც კუბადან დაახლოებით 100 კილომეტრში მდებარეობს. წინა მივლინებაში მე და ჩემმა მეუღლემ და პარტნიორმა, ჯენიფერ ჰეისმა, ჯანსაღი მარჯნის რიფები და მანგროები გადავიღეთ. მაშინ, ვიცოდით, რომ გაზრდილი ტურიზმი და კლიმატის ცვლილება პარკის დაახლოებით 2200 კვადრატულ კილომეტრს სახეს შეუცვლიდა, ამიტომ, 15 წლის შემდეგ, ცვლილებების სანახავად დავბრუნდით.

მანგროების არხში  კასიოპეას ოჯახის წარმომადგენელ მედუზას ვიღებდით. ჯენიფერი ჩემგან ზურგით იყო. კამერაში მოზრდილი ამერიკული ნიანგი შევნიშნე. როდესაც მისი გადაღება დავიწყე, მივხვდი, რომ ზუსტად ჩემსა და ჯენიფერს შორის მოხვდებოდა. რეგულატორით ხმამაღალი ხმების გამოშვება დავიწყე, ჯენისკენ გავცურდი და ფოტოაპარატის სანათით საფრთხეზე ვანიშნე. მან მალევე შემნიშნა და ჩვენი სტუმრისკენ მოტრიალდა.

ჯენიფერ ჰეისი: ამერიკულ ნიანგს პირისპირ შევეჩეხე. გაკვირვებული და გახარებული, ჩემი რეგულატორის საშუალებით მივესალმე.

დდ: ცერა თითი ამიწია, თავი დამიქნია და ბუშტებით გასაგებად დაუძახა: „გამარჯობა, ლამაზო“, როდესაც მისი პორტრეტის გადასაღებად დაიხარა. გამიკვირდა, თუ როგორი პატივისცემით, ინტერესითა და სიამოვნების გრძნობით შეხვდა ნიანგს. ჯენიფერმა ეს მომენტი სრულიად აუღელვებლად გადაიღო.

ჯჰ: თავი საფრთხეში არ მიგრძვნია. დღეების განმავლობაში ვაკვირდებოდი ნიანგებს: ისინი მანგროებში დასეირნობდნენ, გასართობად თევზებს დასდევდნენ და ჩვენგან ახლოს ეძინათ. თუმცა, ისიც მინდა განვმარტო, რომ იმ მომენტში, თავს კომფორტულად ვგრძნობდი ნიანგის სწორედ ამ სახეობასთან. სხვა ადგილას, უფრო აგრესიულ სახეობასთან – ნილოსის ან ზღვის ნიანგთან ასე არ იქნებოდა.
ბევრი მეკითხება, გაბრაზებული ხომ არ ვარ იმის გამო, რომ დევიდმა სურათი გადამიღო იმის მაგივრად, რომ ჩემი „გადარჩენა“ ეცადა. მე კი ვპასუხობ, რომ მეწყინებოდა, ასე რომ არ მოქცეულიყო. მე იმ არსების საუფლოში ვიყავი სტუმრად და თანაც ასეთი უხსოვარი დროის ცხოველის ნახვა კი არ მაშინებს, არამედ მახარებს.

დდ: ჩვენი სამუშაო ყოველთვის გულისხმობს საფრთხეს. მე და ჯენიფერს ხშირად შეგვიწყვეტია ყვინთვა აგრესიული ცხოველების გამო, ჩვენი და მათი უსაფრთხოებისთვის, მაგრამ ამ შეხვედრამ კარგი სიახლე გამოავლინა დედოფლის ბაღებში: იქ ნიანგის ყოფნა ჯანმრთელ საზღვაო ეკოსისტემაზე მიანიშნებს, რომელსაც დიდი მტაცებლების შენახვა შეუძლია. ეს ნაკრძალი კონსერვაციის წარმატებული მაგალითია. სამგზავრო შეზღუდვების შემსუბუქება აუცილებლად მეტი ტურისტის შემოდინებას გამოიწვევს, ამიტომ, მნიშვნელოვანია ეკოტურიზმს, კვლევასა და კონსერვაციას შორის ბალანსის დაცვა. ეს შესაძლებელია, თუ ყველა სტუმარი ისევე მიუდგება ზღვის ცხოველებს, როგორც ჩვენ. ოკეანეებში ჩვენ ხომ მათი სტუმრები ვართ და მათსავე წესებს ვემორჩილებით.

საზღვაო ბიოლოგი ჯენიფერ ჰეისი და ფოტოგრაფი დევიდ დუბილე მრავალი ჯილდოს მფლობელი წყვილია. დუბილე Rolex-ის ელჩი და Rolex-ისა და National Geographic-ის ახალი თანამშრომლობის მონაწილეა. თანამშრომლობის დევიზი „მარადიული პლანეტისთვის თავდადებულები“ მის მისიას ასახავს: დედამიწის ოკეანეების, პოლუსებისა და მთების კონსერვაციისა და კვლევის ხელშეწყობა.