სხეულის დაბეჭდილი ნაწილები შენი „განახლებისთვის“

რა მოხდებოდა, ღილაკზე თითის დაჭერით თქვენთვის ახალი ცხვირის ან თირკმლის დაბეჭდვა რომ შეგეძლოთ? მეცნიერები ცდილობენ, სპეციალური 3-D პრინტერების საშუალებით სხეულის ცოცხალი ნაწილები შექმნან.

ბიოპრინტერებად წოდებული მანქანები „მელნად“ ადამიანის უჯრედებს იყენებენ. ბიოპრინტერი უჯრედების ფენებით სამგანზომილებიან ქსოვილებსა და ორგანოებს ქმნის.

ყურის შესაქმნელად პრინტერი ჰიდროგელის დრეკად, ფორებიან „ჩონჩხს“ ქმნის. „ჩონჩხი“ კანისა და ხრტილის უჯრედებით იფარება, რომლებიც იზრდება და ყურის ფორმას ავსებს. ჰიდროგელი დროთა განმავლობაში ბიოდეგრადირებადი მასალაა. 6 თვეში ყური უკვე მთლიანად ადამიანის უჯრედებისაგანაა შემდგარი. „ჩვენ თავად პაციენტების უჯრედებს ვიყენებთ“, ამბობს ენტონი ატალა, Wake Forest University-ის რეგენერაციული მედიცინის ინსტიტუტის დირექტორი. „ასე ადამიანის ორგანიზმი ორგანოებს აღარ განდევნის“.

ორგანოს დაბეჭდვამდე თვით მეცნიერებმა უნდა გაარკვიონ, როგორ შექმნან ისინი. ლაბორატორიებში მათ შარდის ბუშტები, ვენები და სხვა ანატომიური ნაწილები აქვთ გამოყვანილი, რომლებსაც ისინი პაციენტებს უნერგავენ. ახლა ისინი მათ გადატანას ცდილობენ 3-D ბიოპრინტერებზე და იმედოვნებენ, რომ მალე შეძლებენ დაბეჭდილი ორგანოების იმპლანტაციას. მინიატურული თირკმლები და ღვიძლები უკვე გამოიყენება წამლების გამოსაცდელად.