სოკოების მზარდი პოპულარობა

სოკოები ყველგანაა. დედამიწაზე ყველაზე დიდი ორგანიზმიც მანჭკვალას მიწისქვეშა ქსელია, რომელიც 4,8 კმ2-ს იკავებს ორეგონის შტატში.

ამის მიუხედავად, სოკოები სათანადოდ არაა შესწავლილი. ითვლებოდა, რომ ისინი დაბალკალორიულია და არაა ნოყიერი. სინამდვილეში კი ისინი სავსეა მკვებავი ნივთიერებებით. ბიოქიმიკოსისა და ჰერბალისტის, მარტინ პაუელის თქმით, ბევრი სოკო გამოიმუშავებს ნაერთებს, რომლებსაც სიმსივნითა და დემენციით დაავადებულთა მკურნალობის გაუმჯობესების უნარი აქვთ.

რობერტ ბილმანის, პენ-სტეიტის სოკოსა და სამკურნალო მცენარეული კვების ცენტრის დირექტორის მიერ ჩატარებულმა კვლევამ აჩვენა, რომ ზოგიერთ სოკოში არსებულ ანტიოქსიდანტებს – ერგოთიონეინს და გლუტათიონს – ისეთი ასაკობრივი დაავადებებისგან დაცვა შეუძლიათ, როგორებიცაა გულის დაავადებები და ალცჰაიმერი. ზოგიერთი სახეობა ჰალუცინოგენური თვისებებითაცაა ცნობილი. სოკოები მომავალში „სუპერსაჭმელების“ რიცხვში შეიძლება ვიხილოთ.

1. ჩაგა
Inonotus obliquus
სოკო, რომელსაც ხშირად ჩაის სახით მიირთმევენ, ფსორიაზისა და საჭმლის მომნელებელი სისტემის აშლილობის სამკურნალოდ გამოიყენებოდა.

2. გულა სოკო
Hericium americanum
ზოგიერთი კვლევის თანახმად, ეს სოკო, ისევე როგორც სხვები Hericium-ის გვარიდან, კოგნიტიური ჯანმრთელობის გაუმჯობესებასთანაა დაკავშირებული.

3. გრუზა სოკო
Grifola frondosa
სოკო, რომელიც გლუკოზას ამცირებს და იმუნიტეტს აუმჯობესებს.

4. რეიში
Ganoderma lucidum
ჩინეთში უკვდავების სოკოდ ცნობილი რეიში ტრადიციულად სიცოცხლის გასახანგრძლივებლად გამოიყენებოდა, ახლა კი ის ალერგიისა და ართრიტის სამკურნალო საშუალებაა.

5. ბაბუაწვერა
Hericium erinaceus
რადგან ის ტვინში ნერვების ზრდას უწყობს ხელს, მისი გამოყენება შესაძლებელია ნეიროდეგენერაციული დაავადებების მკურნალობისას დამხმარე საშუალებად.

6. ქერცლოვანა
Pholiota adiposa
ქერცლოვანას ექსტრაქტის მიღებამ შეიძლება სისხლში ცხიმის დაგროვებისა და მაღალი ქოლესტერინისგან დაგვიცვას.

7. კალმახა სოკო
Pleurotus ostreatus
კალმახა ხელს უწყობს ქოლესტერინის კლებას და მაღლა წევს C და E ვიტამინების დონეს.

8. ინდური კალმახა
Pleurotus pulmonarius
კალმახას ეს სახეობა შეიცავს ანტიოქსიდანტებს და ანთების ჩაქრობას შეიძლება უწყობდეს ხელს.

9. ვერხვის ხის სოკო
Cyclocybe aegerita
ამ სოკოს ანტიოქსიდანტურმა თვისებებმა თაგვების კანში კოლაგენის მატება და დაბერების ნიშნების შემცირება გამოიწვია.

10. ყვითელი კალმახა
Pleurotus citrinopileatus
სხვა კალმახა სოკოების მსგავსად, ყვითელი კალმახაც ანტიოქსიდანტების ცნობილი წყაროა.

11. შიიტაკე
Lentinula edodes
ამ სოკოს ექსტრაქტის ინექციამ შეიძლება სიმსივნის ზრდა შეანელოს და გააუმჯობესოს ქიმიოთერაპიის შედეგები.