სტარტის მაყურებლები

„თქვენც რაკეტის გაშვების საყურებლად ხართ მოსული?“ – მკითხა ტედ ებერსმა, როდესაც 2023 წლის 19 აპრილის საღამოს ტეხასში, საუთ-პადრე-აილენდზე შევხვდით. პასუხი აშკარა იყო: ორივენი დროს ვკლავდით მეორე დღეს დაგეგმილი მსოფლიოში უძლიერესი რაკეტის გაფრენამდე. 58 წლის კანადელი ყოფილი სახელმწიფო მოხელე ებერსი ტორონტოდან მანქანით ჩამოვიდა, რათა ბოკა-ჩიკაში მდებარე SpaceX-ის კოსმოდრომიდან რაკეტის აფრენისთვის ეყურებინა. მან 3000 კილომეტრი მარტომ გამოიარა და ღამით საკუთარ Tesla Model Y-ში ეძინა.

გარიჟრაჟზე ებერსიც და მეც იმ ათასობით ადამიანს შევუერთდით, რომლებიც 33-ძრავიანი რაკეტა-მატარებლის, Super Heavy-ის საცდელი აფრენის სანახავად შეკრებილიყვნენ. მას უნდა აეზიდა Starship-ის ზედა საფეხური, რომელიც SpaceX-მა ააგო მთვარესა და მარსზე მგზავრებისა თუ ტვირთის გასაგზავნად.

აქ შეკრებილ ხალხში სადღესასწაულო განწყობა იგრძნობოდა.

შეიძლება ითქვას, რომ ისინი აშშ-ის კოსმოსური ფრენების ოქროს ხანის თვითმხილველები არიან.

20 აპრილს 8:33 საათზე ებერსი ცხოვრებაში პირველად უყურებდა რაკეტის გაშვებას, როდესაც Starship-ის რაკეტა-მატარებელი სასტარტოდ მოემზადა. „დავინახეთ, როგორ დაიწყო რაკეტამ ჰაერში აწევა“, – ამბობს ებერსი. მაგრამ რაკეტა-მატარებლის გამონაბოლქვის მძლავრმა ნაკადმა სასტარტო პლატფორმიდან ბეტონის მოზრდილი ნატეხები აყარა, რამაც, სავარაუდოდ, რამდენიმე ძრავა დააზიანა. 120-მეტრიანმა რაკეტამ 36 500 მეტრის სიმაღლეზე რყევა დაიწყო და აფრენიდან დაახლოებით 4 წუთში Starship-ი და მისი რაკეტა-მატარებელი თვითგანადგურების ფუნქციით აფეთქდა, ისე რომ კოსმოსური ხომალდი რაკეტა-მატარებელს ვერც კი გამოეყო. არ აქვს მნიშვნელობა, თქვა ებერსმა, „რაც მთავარია, კოსმოსური ხომალდი აფრინდა და ჩვენ ეს ყველამ დავინახეთ“. მართალია, იგი პირველად შეესწრო რაკეტის გაშვებას, მაგრამ ტურისტების კრედოს მის სიტყვებზე უკეთ სხვა ვერც გამოხატავდა.