ვარდისფერი მშვენიერება

ფლორიდის ფრთოსანი სიმბოლო 1900-იანი წლებიდან დიდწილად გაუჩინარებული იყო. მონადირეებმა ადგილობრივი პოპულაცია ექსტრავაგანტურ, ბუმბულიან ქუდებზე მოთხოვნის გამო გაანადგურეს. მიუხედავად იმისა, რომ მაიამიში 1930-იან წლებში ერთი კოლონია რეინტროდუქციის გზით დააბრუნეს, ხოლო კარიბის ზღვის ქარიშხლები დროდადრო ველურ ფლამინგოებს აშშ-ის გარკვეული მხარეებისკენ ერეკებოდნენ, ეს ფრინველები იქ საბოლოოდ ვერ მკვიდრდებოდნენ. თუმცა შარშან ქარიშხალმა „იდალიამ“ დაახლოებით ასი შემთხვევითი „ტურისტი“ ფლორიდისკენ გარეკა და მათ იქ დარჩენა გადაწყვიტეს. ახლად ჩამოფრენილთაგან ხუთი ინდივიდის სანიშნე რგოლების საშუალებით გაირკვა, რომ ისინი მექსიკის იუკატანის ნახევარკუნძულიდან იყვნენ. კონსერვაციულ ძალისხმევათა ათწლეულების შედეგად კარიბის ზღვის რეგიონში დიდი კოლონიები აღდგა და 1950-იანი წლების შემდეგ ამერიკული წითელი ფლამინგოების პოპულაცია 21 000-დან 260 000-330 000 ინდივიდამდე გაიზარდა. ახლა აქ სანაპიროების აღდგენა და ტროპიკებთან შედარებით დაბალი ტემპერატურა შესაძლოა ფლამინგოებს თავიანთი ისტორიული არეალის პერიფერიებისკენ უბიძგებს, ამბობს ჯერი ლორენცი, Audubon Florida-ს კვლევითი დირექტორი. ამავდროულად, ბიოლოგები ეძებენ ამ ადგილებთან გრძელვადიანი და სერიოზული მიჯაჭვულობის ნიშნებს: ბუდეებს.

National Geographic Society აფინანსებს მკვლევარ ჯოელ სარტორეს პროექტ „ფოტოკიდობანს“, რომლის მიზანია მსოფლიოს ზოოპარკებში, აკვარიუმებსა და ნაკრძალებში ბინადარი ყველა სახეობის დოკუმენტირება.