წელიწადი ფოტოებში

უკვე ორი წელია, რაც National Geographic Magazine-ი გასულ წელიწადს ფოტოებით აჯამებს. იდეა სპეციალური გამოცემის მომზადების შესახებ, სადაც თხრობის მთავარი კომპონენტი ფოტოგრაფია იქნებოდა, პანდემიის პირველმა წელმა გააჩინა – პერიოდმა, რომელმაც იმდენი გამოცდა ჩაგვიტარა, კიდევაც რომ ვეცადოთ, სრულად ვერ ჩამოვთვლით. ამიტომაც გადავწყვიტეთ მაშინ, მოგვემზადებინა ჟურნალი, რომელიც თვალსაჩინოდ დაგვანახებდა პანდემიის მძიმე პროცესსა და უკვე არსებულ შედეგებს, საპროტესტო ტალღას, რომელმაც სხვადასხვა მიზეზით მსოფლიოს მრავალ ქვეყანაში იფეთქა 2020 წელს, თუ ბუნებრივ კატასტროფებს, რომლებიც მთელ დედამიწაზე მრავლად დაფიქსირდა. 

2022 წელი თითქოს ნორმალურ ცხოვრებასთან დაბრუნების პროცესით აღინიშნა, თუმცა გასული წლის ფოტოებით შეჯამება National Geographic-ის ტრადიციად იქცა. ამერიკული გამოცემის მთავარი რედაქტორის, ნეითან ლამპის ესეი ერთგვარი გზამკვლევია, რომელიც დეკემბრის ნომრის სტრუქტურაში გაგარკვევთ, გამოცემა კი შესაძლებლობას გაძლევთ, National Geographic-ის არაჩვეულებრივი ფოტოგრაფების რაკურსიდან დაინახოთ ჩვენი საზოგადოებისა თუ სამყაროს პრობლემები, რომლებიც ოთხ ძირითად მიმართულებას – კულტურას, ცხოველთა სამყაროს, მეცნიერებასა და გარემოს დაცვას აერთიანებს. თითოეული ფოტო უზადო პროფესიონალიზმის, თავდადებისა და ნიჭიერების ეტალონია, თუმცა მე, პირადად, თვალი ვერ მოვწყვიტე ორსოლია ჰაარბერგის ნამუშევარს, რომელზეც დანიის თავგადასავლების ბანაკში მოწყობილი ფიცარფენილი „სანაპიროა“ გამოსახული, მხოლოდ არა მზის, არამედ „ტყის აბაზანების“ მისაღებად.

National Geographic Magazine – საქართველო თავის ერთგულ მკითხველს დეკემბრის ნომერს ციფრულ პლატფორმაზე წარმოუდგენს, მე კი გილოცავთ დამდეგ 2023 წელს და იმედს ვიტოვებ, რომ მომდევნო წლის შეჯამება კიდევ უფრო ოპტიმისტური და ნათელი იქნება.

გმადლობთ, რომ კითხულობთ National Geographic Magazine – საქართველოს.