რიცხვები:

60 – კლდის ფორმაციების სავარაუდო ასაკი მილიონ წლებში

200 – საფეხურების რაოდენობა რუსანოსის მონასტრამდე მისასვლელად

4 – საათი ათენიდან მანქანით

ქვიშაქვის კლდეებზე განლაგებული მართლმადიდებლური ტაძრები, ნაპრალებში ჩამალული კელიებით, სასურველი სიმარტოვის გამოვლინებაა იმ ბერებისთვის, რომელთაც ეს კომპლექსი XIV-XVII საუკუნეებში ააშენეს. ყველაზე იდუმალ, რუსანოსის მონასტერში, სადაც წმინდა ბარბარეს რელიკვიებია დაცული, ამჟამად 16 მონაზონი ცხოვრობს.

„რუსანოსის მონასტერი მეტეორას მაღალი მწვერვალებითაა ნაწილობრივ გარშემორტყმული“.
— პატრიკ ლი ფერმორი, რუმელი:
მოგზაურობები ჩრდილოეთ საბერძნეთში

როგორ მივიდეთ:
რუსანოსის მონასტრამდე და ცენტრალურ საბერძნეთში მდებარე მეტეორას სხვა მონასტრებამდე ასვლა საუკუნეების განმავლობაში მხოლოდ ასაკეც კიბეებზე აძრომით ან ბაწრებზე გამობმული კალათების საშუალებით იყო შესაძლებელი. შეზღუდული შესვლა მორწმუნეებს მონასტრის შიგნით, ურწმუნოებს კი გარეთ აკავებდა. დღეისთვის ახალი გვირაბები, ციცაბო გზები და კიბეები ეკლესიებს ყველასათვის ხელმისაწვდომს ხდის, ვინც მზადაა კლდისპირა მოგზაურობისათვის. ამ ადგილების მდიდარი ისტორიის უკეთ გასაგებად, მათი დათვალიერება გიდის თანხლებით არის რეკომენდებული.

რას ნახავთ:
შიგნით: რუსანოსის მონასტრის სამლოცველოს კედლებსა და გუმბათოვან ჭერს XVI საუკუნის ბიზანტიური ფრესკები ამშვენებს პლანეტებით, ფარშავანგებითა და სერაფიმებით. ჭაღზე ჩამოკიდებული სირაქლემის კვერცხები მეფურობის, მკვდრეთით აღდგომისა და უსაფრთხოების სიმბოლოებია.
გარეთ: მოგზაურობის ბერძენი ექსპერტი ჯორჯ კურელისი გვირჩევს, რუსანოსის მონასტრის პატარა ხიდზე გადასვლისას ქვევით ჩავიხედოთ მონასტრის ბაღის, ხოლო ზემოთ ავიხედოთ არწივების, შავარდნებისა და იშვიათი სვავების დასანახად.

მიმდებარედ:
რუსანოსის მონასტრის გარშემო განდეგილების 16 უძველესი გამოქვაბული (თქვენი სამთო ფეხსაცმლის წაღება არ დაგავიწყდეთ) და კლდის თავზე მდებარე ხუთი მოქმედი მონასტერია (თავდაპირველი ოცდაოთხიდან). მეტეორონის დიდ მონასტერში იქაური ბერების თავის ქალებია განთავსებული. იქვე ნახავთ ფერად ნახატებსა და XIV საუკუნის პურის საცხობ ღუმელს. გაძარცვული და XX საუკუნის ომებისაგან დაზიანებული ეკლესიების უმრავლესობა ახლა აღდგენილია.