წმინდა მიწის დაცვა

ამერიკის მკვიდრი მოსახლეობა თავისი გამორჩეული ეთნოგრაფიით, ტრადიციებით, რწმენა-წარმოდგენებითა თუ მათთან დაკავშირებული რიტუალებით, ყოველთვის განსაკუთრებული ინტერესის საგანს წარმოადგენდა მეცნიერებისა თუ ხელოვანებისთვის. ამ არაჩვეულებრივ ხალხზე არაერთი მხატვრული ნაწარმოები შექმნილა და მათი კულტურა მრავალი ადამიანის შთაგონების წყარო გამხდარა. გამონაკლისი არც მე ვარ. სმითსონის გაერთიანებაში შემავალი ამერიკელ ინდიელთა მუზეუმი იმ ადგილთაგან ერთ-ერთია, სადაც ყველაზე ხშირად დავდიოდი აშშ-ში ყოფნის დროს და ყოველ ჯერზე სულ უფრო და უფრო დიდი შთაბეჭდილებით ვივსებოდი. თქვენი არ ვიცი და მე ეს იდუმალებით მოცული ხალხი, რომელსაც საოცრად აქვს შენარჩუნებული ბუნებასთან კავშირი, მაჯადოებს და მათი არსის შეცნობის სურვილით მავსებს: მაინც როგორები არიან ისინი სინამდვილეში? რა აწუხებთ? რა უხარიათ? როგორ ადაპტირდნენ ევროპულ კულტურასთან, რამდენად ახლოსაა რეალობასთან ჩვენ მიერ ინტერპრეტირებული მათი წეს-ჩვეულებები და კულტურა? რა აწუხებთ მათ დღეს?

ამ გვერდზე წარმოდგენილი ფოტო ჩრდილოეთ კალიფორნიის კოიოტის ხეობის ჯგუფში შემავალ პომოს ტომს წარმოგიდგენთ; კიდეში კვერთხით პრისცილა ჰანტერი ზის – სინკიონის სახელმწიფო ნაკრძალის ტომთაშორისი საბჭოს დამფუძნებელი და თავმჯდომარე. ამჟამად მისი მთავარი საზრუნავი სინკიონის სახელმწიფო ნაკრძალის მარადმწვანე სეკვოიის შენარჩუნებაა: „ხეები ჩვენთვის ძვირფასია, გვჯერა, რომ წინაპართა სულები ხეებშია“, – ამბობს და საბჭოსთან ერთად ძალ-ღონეს არ იშურებს „ხეების განსაკურნავად“, რათა „ფრინველებს, თევზებსა და სხვა ცხოველებს სახლი შეუნარჩუნოს“.

ივლისის ნომრის მთავარი სტატია „ჩვენ აქ ვართ“, როგორც უკვე მიხვდით, სწორედ ამერიკის მკვიდრ მოსახლეობას ეძღვნება.

გმადლობთ, რომ კითხულობთ National Geographic Magazine – საქართველოს.