შეიძლება, რომ ეს მართლაც წმინდა გრაალი იყოს?

საიდუმლოებებით მოცული წმინდა გრაალი, შეიძლება ითქვას, ყველაზე მოუხელთებელი ქრისტიანული რელიკვიაა, მაგრამ ესპანეთის ვალენსიის საკათედრო ტაძრის სამღვდელოება მრავალი საუკუნეა მიიჩნევს, რომ მათ მფლობელობაში არსებული თასი სწორედ „საიდუმლო სერობის წმინდა ბარძიმია“.

გრაალის ლეგენდის მრავალი ვერსია არსებობს. მათ საერთო ის აქვთ, რომ ეს თასი იესომ საიდუმლო სერობისას გამოიყენა და ჯვარცმისას მაცხოვრის სისხლი მასში შეგროვდა. ამ თქმულებებში წმინდა გრაალი საკრალური ნივთია, რომელსაც, მეფე არტურისა და გალაჰადის მსგავსად, მონარქები თუ რაინდები დაეძებენ თავიანთი სისპეტაკისა და კეთილშობილების დასამტკიცებლად.

ვალენსიის ბარძიმი ესპანურ ისტორიულ წყაროებში პირველად 1399 წელს ჩნდება, როდესაც სან-ხუან-დე-ლა-პენიას მონასტერმა ის მეფე მარტინ არაგონელს გადასცა. მისი ერთ-ერთი მემკვიდრე, მეფე ალფონსო V, სავარაუდოდ, პირველ მმართველად უნდა მივიჩნიოთ, რომელიც ამ თასს წმინდა გრაალად აცხადებს. შესაძლოა ეს მისი მმართველობის ლეგიტიმაციის სტრატეგიული ხერხი იყო, რადგან ამ რელიკვიის მოპოვება მხოლოდ ყველაზე კეთილშობილებს შეეძლოთ, ამბობს უტრეხტის უნივერსიტეტის (ნიდერლანდები) შუა საუკუნეების ხელოვნების პროფესორი მარტინე მეუვესე. დღეს ბარძიმის ნახვა ვალენსიის საკათედრო ტაძრის წმინდა გრაალის სამლოცველოშია შესაძლებელი. ერთი შეხედვით, ის ერთიან თასს ჰგავს, თუმცა სინამდვილეში სამი ცალკეული ნაწილისგან შედგება: სადა ქვის თასი, ოქროს სახელურები და ძვირფასი ქვებით შემკული ძირი.