რიცხვები:

2357 – ტბის სიმაღლე ზღვის დონიდან მეტრებში

0°C – წყლის ტემპერატურა ზამთარში

11 000 – კოლონების ასაკი წლებში

იელოუსტოუნის ეროვნული პარკის ზაფხულის პეიზაჟი ნათელია, მაგრამ ზედაპირის ქვეშ სხვა რეალობაა. ფოტოგრაფი ბრაიან სკერი იელოუსტოუნის ტბის არაამქვეყნიურ ეკოსისტემას ესტუმრა ათასობით წლის წინ მიძინებული ჰიდროთერმული წყაროების მიერ ფორმირებული კოლონების სანახავად. მას ბრეტ სეიმური, ეროვნული პარკის სამსახურის მყვინთავი და ფოტოგრაფი, მიუძღოდა.

სიმაღლის ცვლილება:
ბავშვობაში სკერიმ ქიმიის გაკვეთილებს ქანების შესწავლა ამჯობინა და იმედი ჰქონდა, რომ გეოლოგი გახდებოდა. 11 000 წლის წყალქვეშა ჰიდროთერმულ ფორმაციებს შორის ცურვა საოცნებო დავალება იყო მისთვის, მაგრამ სამხრეთ კორეის წყლებიდან ცოტა ხნის წინ დაბრუნებულს ზღვის დონის 2300-მეტრიანი ცვლილება აფიქრებდა. იელოუსტოუნი ჩრდილოეთ ამერიკაში ამ სიმაღლეზე ყველაზე დიდი ტბაა. რამდენად სწრაფად მოახერხებდა მისი სხეული ცვლილებებთან შეგუებას? ექნებოდა თუ არა კარგი ხილვადობა სურათის გადასაღებად?

წასაღები ნივთების სია:
ყინვასთან მიახლოებული წყლის ტემპერატურისგან დასაცავად სკერის საყვინთი მშრალი კოსტიუმი ეცვა, რომელსაც, რეზინის კომბინეზონისაგან განსხვავებით, თერმული ფენების ადგილი აქვს შიგნიდან. ნავიდან წყალში ჩახტომისას სკერი 45 კილოგრამ აღჭურვილობას ატარებდა.

• მშრალი კოსტიუმი
• აკვალანგისტის აკაზმულობა 13,6-კილოიანი ტყვიის საძირავებით
• მატყლის წინდები, თერმული შარვალი და მაისური
• ცხრა პორტატიული წყალქვეშა ნათურა
• კამერის აღჭურვილობის რვა ყუთი

მზადყოფნა სტარტისთვის:
სკერი და სეიმური ყოველდღე იცვამდნენ აღჭურვილობას და წყალში ხტებოდნენ. ისინი თითქოს მონოქრომულ პარალელურ სამყაროში ეშვებოდნენ. წყალი ბნელი და მღვრიე იყო, ამიტომ სკერის ძლიერი განათება დასჭირდა რვამეტრიანი კოლონის საჩვენებლად. მან და სეიმურმა ცხრა პროჟექტორი ჩაიტანეს და სტუდიური განათების მაგვარად განალაგეს კოლონებთან. ამ სურათის მისაღებად საჭირო სინათლის დაყენებას ერთი კვირა დასჭირდა.