სიურპრიზები ნაცნობ საგნებში

67 წლის პენსილვანიელი მსახიობი და მუსიკოსი, რომელიც, მისივე თქმით, „ჯერ ისევ ოთხი წლის არის“, ცნობისმოყვარეობას National Geographic-სა და Disney+-სთან აძლევს გასაქანს. იგი მოტოციკლებზე, აუზებსა და სვირინგებზე გვესაუბრება. ასეთია „გოლდბლუმის თვალით დანახული სამყარო“.

თქვენი გადაცემის თემები – ჯინსი, თამაში, ნაყინი, ბარბექიუ – საკმაოდ განსხვავებულია, თუმცა უნივერსალური. რატომ აირჩიეთ ეს თემები?

ყველა მათგანი ეკლექტურია, ერთგვარი მელანჟი, პოპური, სიურპრიზებით სავსე. National Geographic-ის გადაცემის „მკვლევარი“ სამი ეპიზოდის წამყვანი ვიყავი და ძალიან მომეწონა. გვინდოდა, ნაცნობ თემაში უჩვეულო რამ გვეპოვა: ისტორიული, სამეცნიერო და ადამიანური.

გაინტერესებთ, რატომ გაინტერესებთ?

როგორც ორი შვილის მამა, გამძაფრებული ცნობისმოყვარეობის ციკლში ვარ ჩართული. სულ მეკითხებიან, ეს რა არის, ასე რატომ არის? შეიძლება მემკვიდრეობითია, იქნებ ჩვენი სახეობა ცნობისმოყვარე უნდა იყოს, სამყაროსთან კავშირი რომ შეინარჩუნოს. ამ გადაცემის კეთების დროს იუვალ ნოა ჰარარის წიგნები წავიკითხე: „საპიენსი“, „ჰომო დეუსი“ და „XXI საუკუნის 21 გაკვეთილი“. ჰარარის თქმით, ისეთი დიდი პრობლემების მოგვარება, როგორებიცაა კლიმატის ცვლილება და ბირთვული იარაღის გავრცელება მხოლოდ საერთაშორისო თანამშრომლობით შეიძლება. ადამიანები იმიტომ განვითარდნენ, რომ ყოველთვის ჯგუფურად მოქმედებდნენ და ცნობისმოყვარენი იყვნენ.

დროში მოგზაურობა რომ შეგეძლოთ, ვის ნახვას ისურვებდით?

ახლახან „ბუნების გამოგონების“ კითხვა დავიწყე ალექსანდერ ფონ ჰუმბოლდტის შესახებ. მან იწინასწარმეტყველა კლიმატის ცვლილების სირთულეები, ცივილიზაციის გაუაზრებელ ქმედებათა შედეგები, ინდუსტრიული რევოლუცია. მასთან საუბარი საინტერესო იქნებოდა. მოკლედ ვიტყვი შოუზე: ეს მე ვარ და არ ვთვალთმაქცობ, რომ ბევრი ვიცი, თუმცა ცნობისმოყვარე ვარ და ამიტომ საინტერესო ადამიანებს ვესაუბრები. ჩემი გონება თავისუფალია.