5054 – მეტრი მყინვარწვერის ზუსტი სიმაღლე
4 – საათი მწვერვალზე გატარებული დრო
3 – მეგაბაიტი (სულ რაღაც) შეგროვებული ინფორმაცია

ექსპედიციამდე ერთი თვით ადრე
მყინვარწვერის სიმაღლე წინა საუკუნის 50-იან წლებში მხოლოდ ბარომეტრით გაზომილა, რამაც ჩვენს ექსპედიციას ზუსტი გაზომვის პიონერობის შანსი მისცა.
ასვლის გეგმა და GPS-აზომვა მწვერვალზე რამდენიმე საათით ყოფნაზე გავთვალეთ. სიმბოლურად გაზომვის თარიღად 26 მაისი, საქართველოს დამოუკიდებლობის დღე ავირჩიეთ.

ექსპედიციამდე ერთი დღით ადრე
გუნდის შერჩევა და საჭირო რესურსები:
ექსპედიცია დაკომპლექტდა მთაში სიარულსა და სკიტურში გამოცდილი გეოგრაფებით, გეოდეზისტებით, საინფორმაციო ტექნოლოგიების სპეციალისტებით, სამთო გამყოლებით, ფოტო და ვიდეო ოპერატორებითა და ჟურნალისტებით – სულ 8 ადამიანი. მოვიმარაგეთ:
• სკიტურის თხილამურები და სამთო აღჭურვილობა;
• ოთხი სამარშრუტე თოკი;
• GPS-სადგურის, სამფეხებისა და ტერმინალების ორი კომპლექტი;
• ჩაქუჩების, რეპერული პალოების და წერტილის კლდეში გასამაგრებლად საჭირო აღჭურვილობის ორი კომპლექტი;
• სათადარიგო ელემენტები;
• აფთიაქი, შოკოლადი, ვაშლი და C-ვიტამინიანი წყალი.

ექსპედიციის დღე
გაზომვა:
მწვერვალზე ასვლისას ქარი 18 მ/წამში სიჩქარით ქროდა, თუმცა წინა დღეებთან შედარებით მაინც ნაკლები იყო. უამინდობის გამო, საბაზო ბანაკიდან 26 მაისის ნაცვლად 27 მაისს ღამის 3 საათზე დავიძარით. მწვერვალზე გეოდეზიური სამფეხი დილის 10 საათზე უკვე გაშლილი გვქონდა. მწვერვალის გაზომვის შემდეგ კლდეზე მომდევნო თაობებისთვის გეოდეზიური ნიშნული დავტოვეთ.
ბანაკამდე წუთებში დავსრიალდით, სადაც გულშემატკივრებმა ცხელი სადილი დაგვახვედრეს.
უამინდობის შიშით მისია, 6 დღის ნაცვლად, 4 დღეში შევასრულეთ – სულ თხილამურებით. ხელსაწყოს მიერ ჩაწერილი მონაცემებით მომდევნო დღეებში საჯარო რეესტრის ეროვნული სააგენტოს პორტალზე სიმაღლე გამოვთვალეთ.

ეს რუბრიკა მომზადდა Caucasus Skitouring Network-თან თანამშრომლობის ფარგლებში.