45 – დალაშქრული კილომეტრი

140 – მეტრი სიმაღლის ჰანგ-ენი

25 – კილოგრამი კამერის აღჭურვილობა

იტალიელმა ფიზიკოსმა და ფოტოგრაფმა ალესანდრო ჩერემ სინგაპურის კვანტური ტექნოლოგიების ცენტრში შვებულება აიღო მსოფლიოში ორი უდიდესი გამოქვაბულის, ჰანგ-ენისა და შონდონგის მოსანახულებლად. 90%-იანი ტენიანობისა და ურთულესი გზის დაძლევა საუკეთესო მოლაშქრეებისთვისაც დიდი გამოწვევაა.

მოგზაურობამდე ერთი თვით ადრე
იღბლიანთა გასეირნება:
მოგზაურთა მხოლოდ მცირე ნაწილს ეძლევა ამ გამოქვაბულების ნახვის შესაძლებლობა, მაგრამ ჩერემ მეგობრის მეგობრის დახმარებით მაინც მოახერხა და ბოლო წუთში მოგზაურთა ჯგუფში მოხვდა. ინტერნეტში ფოტოების დათვალიერებისას მიხვდა, რომ გამოქვაბულში კონტრასტული სინათლის აღსაქმელად განსაკუთრებული ლინზები დასჭირდებოდა და ამიტომ კამერის ახალი აღჭურვილობის შეძენა გადაწყვიტა. მოგზაურობის მოახლოებასთან ერთად, ჩერე ყოველდღიურად ემზადებოდა ფიზიკურად სულის შემხუთველ ჯუნგლებში ლაშქრობისა და ცოცვის სირთულეების გადასალახად.

მოგზაურობამდე ერთი კვირით ადრე
საჭირო ნივთების სია:
მოგზაურობამდე რთული პრობლემაა მოსაგვარებელი: იქ სისველე და ტალახია, წყალგაუმტარი ჩექმები კი შესაძლოა ფეხის ინფექციების წყაროდ იქცეს.

• ჰაერგამტარი სალაშქრო ფეხსაცმელი, რომელიც ადვილად შრება

• ფეხის ტალკი ბაქტერიული ინფექციების პრევენციისთვის

• წყალგაუმტარი ჩანთა მდინარის გადაკვეთის დროს მნიშვნელოვანი ნივთების შესანახად

• გრძელი შარვალი და გრძელმკლავიანი მაისურები წურბელებისგან თავის დასაცავად

• ოფლის გამოყოფის დროს დაკარგული ელექტროლიტების მარაგის შესავსები აბები

• კამერის მარეგულირებელი შტატივი ცუდი განათების დროს.

მოგზაურობის დაწყების დღე
სრული მზადყოფნა:
ექსპედიციის წევრები ერთმანეთის უკეთ გასაცნობად ჰანოიში რამდენიმე დღე გაჩერდნენ, მოგვიანებით კი დონგ-ჰოიში გაფრინდნენ. ჯუნგლებში შესვლისთანავე ჩერემ მობილური ტელეფონი სიამოვნებით გამორთო. ვიწრო ბილიკი ხან ზემოთ ადიოდა, ხან ქვემოთ ეშვებოდა. ჯგუფის წევრები ოთხი დღე მიიკვლევდნენ წელამდე წყალში გზას, სანამ გამოქვაბულამდე მიაღწევდნენ და დაბანაკდებოდნენ. შონდონგის ბოლოში აზიდული ვიეტნამის დიდი კედელი 60-მეტრიან ბარიერად აღიმართა, რომელიც კიბითა და თოკებით უნდა გადაელახათ.