ქალებისთვის განკუთვნილ სამედიცინო დახმარებაში, ზრუნვაში, კვლევასა და მხარდაჭერაში უამრავი პრობლემაა, თუმცა აღმოჩენები და წინსვლა, რომლებიც გოგონებსა და ქალებს ბევრს გვპირდება, ოპტიმიზმის საფუძველს გვაძლევს. განსაკუთრებით იმედიანად მაშინ ვარ, როდესაც იმ ერთ საქმეს ვაკეთებთ, რომელიც ყველაზე მეტად წაადგება ჩვენს კეთილდღეობას: ვიღებთ ხმას!

აუცილებელია, რომ რაც შეიძლება მეტმა ქალმა დაიწყოს ლაპარაკი – მუცლის მოშლაზე, უშვილობაზე, კონტრაცეფციის პრობლემებზე, კიბოსა და გულის დაავადებებზე, დეპრესიაზე, შფოთვაზე, წონაზე, კვებით აშლილობაზე, ალკოჰოლიზმზე, რეცეპტით გამოწერილ წამლებზე დამოკიდებულებასა და ოჯახურ ძალადობაზე. ბევრ ჩვენგანს ამ მდგომარეობასთან დაკავშირებული სტიგმა გვაჩუმებს, მაგრამ ხმამაღალი მხარდაჭერის გარეშე არც კვლევებს დააფინანსებენ და არც პოლიტიკას გადახედავენ. მხოლოდ ხმის ამოღებით შეგვიძლია ერთმანეთის გაძლიერება და ჯანსაღი ცვლილებების მამოძრავებელ ძალად გაერთიანება.

2015 წელს გაეროს წევრი ქვეყნები შეთანხმდნენ, რომ 2030 წლისთვის თითოეულ ბავშვს, კაცსა და ქალს საბაზისო ჯანდაცვა უნდა ჰქონდეს. დღეს, როდესაც ასობით მილიონ ადამიანს ხელი არ მიუწვდება სამედიცინო დახმარებაზე, ამ მიზნისგან ჯერ კიდევ ძალიან შორს ვართ, თუმცა მისთვის ბრძოლა მაინც ღირს. თითოეულ ჩვენგანს შეუძლია დაიწყოს პირადი, ოჯახის, საზოგადოებისა და ქვეყნის საჭიროებებისთვის ბრძოლითა და ჯანმრთელად ცხოვრებით.

„გრეის ანატომიის“ ერთ-ერთ სეზონში მერედით გრეი ძლივს გადაურჩება სასტიკ თავდასხმას. როდესაც იგი გამომჯობინდება, ხმის ამოღების მნიშვნელობაზე ძალიან შთამბეჭდავ რჩევას გვაძლევს. ამ ესეისაც მისი

სიტყვებით დავასრულებ:
„არ მისცეთ შიშს თქვენი გაჩუმების საშუალება. თქვენ გაქვთ საკუთარი ხმა – გამოიყენეთ ის. ალაპარაკდით. აწიეთ ხელი. იყვირეთ პასუხები. გააგონეთ სხვებს თქვენი სიტყვები“.

ექიმი ზოან კლაკი ABC-ის სერიალის, „გრეის ანატომიის“, აღმასრულებელი პროდიუსერი და შოუს დაწყებიდან (2005 წელი) მისი ერთ-ერთი სცენარისტია. იგი, ასევე, სერიალის სამედიცინო მრჩეველია. კლაკმა რეზიდენტურა სასწრაფო დახმარებაში გაიარა, აქვს სამაგისტრო ხარისხი საჯარო ჯანდაცვაში და ერთი წელი დაავადებათა კონტროლისა და პრევენციის ცენტრში საერთაშორისო სასწრაფო დახმარების განყოფილებაში მუშაობდა. ჰყავს ერთი ვაჟი და ტყუპი ქალიშვილები.

National Geographic Partners-ი და ABC Television Network-ი The Walt Disney Company-ის მფლობელობაშია.

სრული ვერსია წაიკითხეთ იანვრის ნომერში.