საფლავის საშიში ხედი

პალესტინელთა ლიდერის, იასირ არაფატის გარდაცვალებას 2004 წელს მის მიმდევართა ყოვლისმომცველი მწუხარება მოჰყვა. Associated Press-მა მდინარე იორდანის დასავლეთ ნაპირზე თორმეტამდე ფოტოგრაფი გაგზავნა მისი დაკრძალვის გადასაღებად. „მე იმ მოხეტიალე ბიჭებიდან ერთ-ერთი ვიყავი“, – ამბობს დევიდ გუტენფელდერი.   

ფოტოგრაფების უმეტესობამ ადგილები არაფატის გალავანშემორტყმული შტაბ-ბინის მიმდებარე სახურავებზე დაიკავა. თავად შენობასთან ათობით ათას ადამიანს მოეყარა თავი. როდესაც ჰორიზონტზე არაფატის კუბოს გადამტანი ვერტმფრენი გამოჩნდა, გუტენფელდერის თქმით, „მგლოვიარეები კედლებს მიაწყდნენ და მათზე გადაძრომა დაიწყეს. მეც იგივე მოვიმოქმედე“.

 ბრბოს კუბო ხელიდან ხელში გადაჰქონდა. გუტენფელდერმა ხალხის გროვაში მეტ-ნაკლებად ხელსაყრელი ადგილისკენ გაიკაფა გზა – საფლავის კიდის მახლობლად. ბრბოს წნეხის მიუხედავად, კადრის გადაღება მოახერხა.  

შემდეგ ბრბო აზვირთდა და გუტენფელდერს ვიღაცამ ხელი ჰკრა. მან იგრძნო, რომ ქვემოთ ვარდებოდა: „ზურგზე დავეცი. მის საფლავში აღმოვჩნდი“, – ამბობს იგი.  ხალხმა გუტენფელდერი სწრაფად ამოიყვანა. საფლავის კიდეზე დგომისას იგრძნო, რომ სწორედ აქ უნდა მდგარიყო. მისი თქმით, ფოტოგრაფის „საქმეა მთელი იმ ენერგიის, ქაოსისა და ემოციის აღბეჭდვა და ადამიანებისთვის იმ შეგრძნების მინიჭება, რომ შენთან ერთად არიან მოვლენების შუაგულში“.

დევიდ გუტენფელდერი

ვრცლად