რიცხვები:

11 700 – კილიმანჯაროს მყინვარების სავარაუდო ასაკი, წლებში

2030 – მყინვარის გაქრობის წელი, ზოგი მეცნიერის შეფასებით

5895 – კილიმანჯაროს სიმაღლე, მეტრებში

ეკვატორთან ახლოს ამგვარი გაყინული მასები ტროპიკულ ანომალიებს წარმოადგენს. მზის სხივებისგან მყინვარის ძირი დნობას იწყებს, იშლება და ზოგჯერ ეულად დარჩენილ სვეტებად ნაწევრდება (ფოტოზე მარცხნივ). კილიმანჯაროს ყინულზე ცოცვის უნიკალური შესაძლებლობა დროულად უნდა გამოიყენოთ, რადგან მალე ისიც გაქრება.

„ჩემი აზრით, თვითგადარჩენის განმსაზღვრელი უმთავრესი
ფაქტორი არა სიძლიერე, არამედ გარემოს მიყურადების უნარია”.
— უილ გედი

ექვსი თვით ადრე
ფორმაში ჩადგომა:
ამ მთასთან შეჭიდება სერიოზულ ფიზიკურ და გონებრივ მომზადებას მოითხოვს, რისთვისაც მთამსვლელი უილ გედი გირჩევთ, ყოველდღიურ ვარჯიშსა და ჯანსაღ კვებას არანაკლებ ექვსი თვით ადრე შეუდგეთ. ამას გარდა, სავარჯიშო ასვლებისას ისეთი ნიშნების ამოცნობის უნარი უნდა გამოიმუშაოთ, რომლებიც, შესაძლოა, არახელსაყრელ ამინდს – ძლიერ ქარს ან წვიმას მოასწავებდეს.

ორი კვირით ადრე
აუცილებელი ნივთების სია:
გედის აზრით, ყინულზე ცოცვისას მაღალი ხარისხის აღჭურვილობა გადამწყვეტი მნიშვნელობისაა – როგორც სიამოვნების მიღების, ასევე ცოცხლად გადარჩენის თვალსაზრისით. დანარჩენი აუცილებელი ნივთების სია:
• მახვილი და მყარად მორგებული წრიაპები
• წერაყინები
• ჩაფხუტი – თავდაცვა ვარდნის ან ყინულის ჩამოცვენის შემთხვევისთვის
• ხელთათმანები – თბილი და მოქნილი
• ქურთუკი – წყალგაუმტარი, ქარისგან დამცავი
• თოკი და უსაფრთხოების ღვედი.

წინა დღე
ასვლისთვის მზადყოფნა:
პატივი ეცით თანმხლებ მზიდავებს: დიდი ალბათობით სიმაღლის ავადმყოფობა არც მათ ინდობს. ასვლის დაწყებამდე კარგად შეაფასეთ გარემოებები: იქნებ ძალიან ქარიანი ამინდია ან წვიმას აპირებს? – „მთებსა და მყინვარებზე ასვლა საუკეთესო პირობებშიც კი საკმაოდ საშიშია, ასე რომ დამატებითი სირთულეების შემთხვევაში გარისკვა არ ღირს“, – გვეუბნება გედი.