რიცხვები:

-7°C – ღამის ტემპერატურა 4000 მეტრზე

4844 – ბეიკერის მთის მწვერვალი (მეტრი) 

22 – ბეიკერის მთაზე გატარებული დღეების რაოდენობა

„ასვლისას მცენარეები ტროპიკული ტყეებიდან მთის ტყეებამდე და შემდეგ გაშლილ მინდვრებამდე იცვლებოდა”. – კრისტიან ციგლერი

გზის დაგეგმვა
გერმანელი გეოლოგების ჯგუფის გადასაღებად დამპატიჟეს, რომლებიც GPS-ის დეტალურ ჩანაწერებს იყენებდნენ იმის გასაზომად, თუ როგორ ცვლის ტექტონიკური ფილების მოძრაობა რუვენზორის მთებს. გამგზავრებამდე თვეებით ადრე, ტენიანი კლიმატისაგან დასაცავად, წყალგაუმტარი ტანსაცმელი და ჩანთები ვიყიდე. შემდეგ გეგმა შევიმუშავეთ. მთის მასივი კონგოს დემოკრატიული რესპუბლიკისა და უგანდის საზღვარზეა. ჩემი რჩევით, ჯგუფმა უგანდის მხრიდან ასვლა გადაწყვიტა, რათა კონგოში აჯანყებულებისათვის აერიდებინა თავი. 

საჭირო ნივთების სია
ბეიკერის მთის ძირას ტემპერატურა 30 გრადუსამდე იყო. ასვლისას ჯერ  აცივდა, მერე წვიმა წამოვიდა და ქარმა იმატა, შემდეგ გათოვდა. პაპანაქებიდან გამყინვარებამდე სულ რამდენიმე დღეში მივაღწიეთ.
• თბილი საძილე ტომარა
• ოთხი წყალგაუმტარი ჩანთა
• GPS მოწყობილობა
• შოკოლადი (არასაკმარისი)
• კამერის ლინზის მაპოლარიზირებელი ფილტრი, მთის შუქის გასაფანტად
• დამატებითი მყარი დისკი ყოველ ღამე ფოტოების ჩასაწერად
• ასპირინი სიმაღლის ავადმყოფობისთვის

მზადყოფნა გასამგზავრებლად
რუვენზორის მთებზე ამ სიმაღლეზე ასვლა ჩემი ოცნება იყო და მოუთმენლად ველოდი. პანამიდან ნიუ-იორკში, შემდეგ ამსტერდამში და ბოლოს უგანდაში, ენტებეში ჩავფრინდი. იქ გეოლოგებს შევხვდი და ერთად წავედით დასავლეთის საზღვრისკენ. რუვენზორის მთების ძირში, ერთ ქალაქში 15 დამხმარე, მზარეულები და ერთი შეიარაღებული მცველი ვიშოვეთ ბეიკერის მთაზე წამოსაყოლად.