დაძმობილების პროექტმა მეცნიერებასა და ბიზნესსექტორს შორის კავშირების გასაძლიერებლად შოთა რუსთაველის ეროვნულ სამეცნიერო ფონდთან ერთად 2022 წლის 23-25 მარტს გამართა რამდენიმე ინტერვიუ ფოკუსჯგუფებში. შეხვედრაზე სხვადასხვა კლასტერის, ასოციაციისა და კომპანიის წარმომადგენლებთან ერთად განიხილეს მეცნიერებასა და ბიზნესსექტორს შორის თანამშრომლობის შესაძლო თემები, რომლებიც  საზოგადოებას მნიშვნელოვანი პრობლემების გადაჭრაში დაეხმარება.  

„ეს შეხვედრები ძალიან კარგი შესაძლებლობა იქნება მეცნიერებასა და ბიზნესკომპანიებს ან, თუნდაც, საზოგადოებას შორის უფრო მჭიდრო კავშირების დამყარებისთვის საჭირო პოტენციალის გამოსავლენად საქართველოში. ჩვენ ოპტიმისტურად ვართ განწყობილნი იმასთან დაკავშირებით, რომ მიუხედავად დაბრკოლებებისა, რომლებიც ზოგადად არსებობს მეცნიერებასა და ინდუსტრიას შორის თანამშრომლობის კუთხით, ჩვენ შევძლებთ პერსპექტიული სფეროების და თანამშრომლობის გზების გამოვლენას. ამისთვის, თუ საჭირო გახდება, გავცემთ მითითებებს მეცნიერების დარგში სისტემური ცვლილებების აუცილებლობაზე“, – აღნიშნა პროექტის ლიდერმა ვოლფგანგ პოლტმა იოანეუმის კვლევითი ინსტიტუტიდან (ავსტრია).

     შოთა რუსთაველის ეროვნული სამეცნიერო ფონდის გენერალურმა დირექტორმა ჯაბა სამუშიამ აღნიშნა, რომ სამეცნიერო პრიორიტეტების განსაზღვრა სტრატეგიულად მნიშვნელოვანია საგრანტო კონკურსების და, ზოგადად, ფონდის განვითარებისთვის.

     ძალიან მნიშვნელოვანი შეხვედრა გაიმართა საქართველოს მეცნიერებათა ეროვნულ აკადემიაში, სადაც განიხილეს უკანასკნელი ათწლეულის მნიშვნელოვანი სამეცნიერო მოვლენები საქართველოში და სხვადასხვა დარგის აკადემიკოსების საქმიანობა, რომელიც მნიშვნელოვანია მეცნიერებასა და ბიზნესის თანამშრომლობისთვის. „ამ შეხვედრამ კიდევ ერთხელ გამოავლინა საქართველოში მიმდინარე ტექნოლოგიური განვითარების მნიშვნელობა. მიუხედავად გარკვეული პრობლემებისა, ქვეყანაში მაინც სახეზე გვაქვს ინოვაციური ტექნოლოგიების განვითარების პროცესი სხვადასხვა სამეცნიერო მიმართულებით. ეს ინოვაციური ტექნოლოგიები საინტერესოა პრაქტიკული გამოყენების თვალსაზრისით და უნდა გახდეს მეცნიერებასა და ბიზნესკომპანიებს შორის თანამშრომლობის საფუძველი“, – აღნიშნა საქართველოს მეცნიერებათა ეროვნული აკადემიის პრეზიდენტმა გიორგი კვესიტაძემ.

     კიდევ ერთი საინტერესო შეხვედრა გაიმართა საქართველოს ეროვნულ მუზეუმში კრეატიული მრეწველობისა და კულტურული მემკვიდრეობის წარმომადგენლებთან, რომელზეც განიხილეს დარგის საჭიროებები და გამოწვევები.

„საქართველოში ორი წლის განმავლობაში მუშაობის შემდეგ კიდევ ერთხელ ვრწმუნდები, რომ ეს საოცარი ქვეყანაა, რომელიც შთააგონებს ადამიანებს დიდ იდეებს და შეუძლია გააერთიანოს საერთაშორისო პარტნიორები სხვადასხვა სფეროებიდან. მართლაც, ინტერდისციპლინურობა საქართველოს ერთ-ერთი მთავარი უპირატესობაა. მნიშვნელოვანი მიღწევის მაგალითად მინდა აღვნიშნო გიორგი ელიავას სახელობის ბაქტერიოფაგიის, მიკრობიოლოგიისა და ვირუსოლოგიის ინსტიტუტი, რომელსაც მდიდარი ისტორია აქვს და ბაქტერიოფაგები, რომლებიც მთელ მსოფლიოში მაღალი მოთხოვნით სარგებლობს, როგორც ანტიბიოტიკების ალტერნატივა მიკრობიოლოგიური დაავადებების სამკურნალოდ“, – განაცხადა ინეს გავარანემ, დაძმობილების პროექტის რეზიდენტმა  მრჩეველმა, რომელიც საქართველოში ცხოვრობს.

  ინტერვიუების დროს აღინიშნა, რომ საქართველო მრავალი გამოწვევის წინაშე დგას და ფუნქციონალური პრიორიტეტების განსაზღვრა უფრო მნიშვნელოვანია მიმდინარე ეტაპზე სამეცნიერო და საგანმანათლებლო სისტემის გაუმჯობესებისთვის, რაც მდგრადი ბიზნესეკოსისტემის განვითარებას გამოიწვევს. „ფუნქციონალური პრიორიტეტები ავსებს თემატურ პრიორიტეტებს და მიზნად ისახავს განსაკუთრებით მეცნიერებისა და ინოვაციების სისტემის ფუნქციონალური ნაკლოვანებების აღმოფხვრას. ასეთი ფუნქციონალური პრიორიტეტები შეიძლება შეეხოს, მაგალითად, ისეთ საკითხებს, როგორებიცაა საწარმოების უზრუნველყოფა ხელმისაწვდომი საერთო ლაბორატორიული სივრცეებით ან ბიზნესსექტორის საჭიროებებზე მორგებული კვლევითი პერსონალის მომზადება“, – აღნიშნა კრისტიან ჰარტმანმა, კომპონენტის ლიდერმა იოანეუმის კვლევითი ინსტიტუტიდან (ავსტრია), რომელიც პასუხისმგებელია სამეცნიერო პრიორიტეტების განსაზღვრაზე საქართველოში.

მეტი ინფორმაციისთვის დაუკავშირდით:

• ინეს გავარანე, ევროკავშირის თვინინგის პროექტის ,,ინტერსექტორული თანამშრომლობის შესაძლებლობების მხარდაჭერა კვლევასა და ინდუსტრიას შორის“ რეზიდენტი მრჩეველი”, [email protected]