იპოვე შენი გემო

ალკოჰოლის დიდი ოდენობით მიღება ვნებს თქვენს ჯანმრთელობას

ვისკის მახასიათებლების გამოვლენისას დეგუსტატორები სხვადასხვა ხერხს მიმართავენ. დარგის პროფესიონალებისთვის უცნაური მათ საქმიანობაში არაფერია, მაგრამ რა უნდა ვქნათ ჩვენ? მე, თქვენ და მათ, ვისაც უბრალოდ სურს თავისი საყვარელი გემოები დააფიქსიროს. არსებობს ერთი მარტივი გამოსავალი და ახლა სწორედ მის შესახებ გიამბობთ.

მანამდე კი წარმოიდგინეთ პროფესიონალი დეგუსტატორები, რომლებსაც ხშირად „ცხვირებს“ ეძახიან, რადგან დეგუსტაცია, გარდა გემოვნური თვისებებისა, სუნის შეფასებასაც გულისხმობს. წარმოიდგინეთ, რომ ისინი ალაოს ვისკის მახასიათებლების გამოვლენას იწყებენ, რისთვისაც მათ შეიძლება  ეგრეთ წოდებული არომატების ბორბალი გამოიყენონ. ბორბლის შუაგულში მოცემულია ის ძირითადი არომატები, რომლებიც პირველივე წამებში ამოიფრქვევა ხოლმე ჭიქიდან. ეს შეიძლება იყოს ტორფის, ხილის, ან ხის არომატი.

შემდეგ დეგუსტატორები თითოეული მახასიათებლის უფრო ღრმად შესწავლაზე გადადიან. იწყებენ არომატის ტიპის რკვევას. იქნებ ტორფის კვამლის არომატია? თუ წამლის სუნს წააგავს? ან იქნებ ორივე? რომელი არომატებია უფრო ძლიერად გამოხატული? ხილის, თუ ყვავილების? თუ ყვავილოვანი არომატია,  რომელი ყვავილების სუნს გაგონებთ:  ვარდის, ლავანდის, ერიკასი თუ ტკბილი ქოქოსის?  თუ  ძიების კვალი დამატებულმა სურნელმა ან არომატიზატორმა გაფანტა, ახლა დეგუსტატორები ამ არომატის ანალოგიებზე იწყებენ ფიქრს –  ყვავილოვანი არომატიზირებული ნარევის სუნი უფრო დომინირებს, თუ სუნამოსი და ასე შემდეგ…

რამდენიმე წლის წინ ვისკის ცნობილმა მიმომხილველმა, დეივ ბრუმმა, ვისკის მწარმოებლის, Diageo-ს წახალისებით გადაწყვიტა, მარტივი ვიზუალიზაციით, რომელსაც გემოთა რუკა ჰქვია, აესახა ვისკის ყველა გემო. ეს რუკა თქვენ ნამდვილად დაგეხმარებათ იპოვნოთ და მოინიშნოთ თქვენი საყვარელი ვისკის გემო. რუკა ორ კატეგორიად ყოფს ყველა ვისკის. ერთი არის ნაზი არომატის, ხოლო მეორე კი – შებოლილი გემოს მქონე ვისკის სახეობები.

აქვე ნაჩვენებია, თუ რამდენად ძლიერია ან მსუბუქია ვისკი და რომელი ალაოთი არის ის დამზადებული. ამ მაჩვენებლებით მარტივია ვისკის ტიპის განსაზღვრა და სხვებთან შედარება. მოძებნეთ რუკაზე ვისკი თქვენთვის სასურველი მაჩვენებლების მიხედვით და დარწმუნებული იყავით, რომ საბოლოო არჩევანი ძალიან მოგეწონებათ.  

გემოთა რუკით სარგებლობა მარტივია: შეხედეთ მასზე მოცემულ მახასიათებლებს და წარმოიდგენეთ, რომელი კომბინაციით მიიღებთ თქვენთვის ყველაზე სასიამოვნო სასმელს. შებოლილი, ნაზი თუ მსუბუქი არომატების მქონე გირჩევნიათ? მახასიათებლებზე დაყრდნობით, აირჩიეთ რუკის შესაბამისი მეოთხედი და მასზე მოცემული ვისკის დასახელებებიდან რომელიმე გასინჯეთ. პირველივე ჯერზე მოახვედრეთ მიზანში? თუ კიდევ მოსინჯავთ სხვა სახეობებსაც?

თუ ფიქრობთ, რომ ახლოს ხართ, რუკაზე თქვენი არჩევანის გვერდით დატანილი ვისკი გასინჯეთ. მაგალითად,  12-წლიანი Cardhu-ს გვერდით დაინახავთ 12-წლიან Royal Lochnagar-ს. ორივე მათგანი მშვენიერი არჩევანია.

გემოთა რუკა შეგიძლიათ გამოიყენოთ განსაკუთრებული გემოების აღმოსაჩენად. იმისთვის, რომ სწრაფად შეისწავლოთ, ყველა მეოთხედიდან თითო დასახელების ვისკი გასინჯეთ. მაგალითად, თუ 12-წლიანი Cardhu-თი დაიწყებთ, შემდეგ გასინჯეთ 10-წლიანი Talisker-ი და ნახავთ, რომ ის მეტად სხეულიანი არ არის, მაგრამ შებოლილი გემო მასში უფრო გამოხატულია, ხოლო 12-წლიან Dufftown-ს რომ გასინჯავთ, ნახავთ, რომ ის Cardhu-ზე მეტად სხეულიანია, მაგრამ შებოლილი/ნაზი გემოს აღმნიშვნელ ღერძზე ისინი თანაბარ პოზიციებზე არიან. ორივეს დაგემოვნების შემდეგ უკეთ გეცოდინებათ, რამდენად ითვისებთ განსხვავებულ გემოებსა და ფაქტურებს. თუ ვისკის არომატებსა და ფაქტურებს ამ მეთოდით შეიცნობთ, მიხვდებით, რომ ერთალაოიანი ვისკი (single malt) სულაც არ ნიშნავს ერთ სასმელს. პირიქით – სულ სხვადასხვაგვარი შეიძლება იყოს.

გამოიყენეთ გემოთა რუკა, და თქვენ შეძლებთ თვალი გაადევნოთ თქვენს პროგრესს. შემდეგ წრეზე კი უფრო მეტი სიამოვნება მიიღოთ. უკან არ დაიხიოთ, სცადეთ!