კვლევის მოლეკულურ და გენეტიკურ მეთოდებს თანამედროვე დიაგნოსტიკის ეფექტურობის გაზრდის უზარმაზარი პოტენციალი აქვს. დღეს ეს მეთოდები საშუალებას იძლევა, დაისვას უტყუარი დიაგნოზი, მოხდეს მოცემული დაავადების სირთულის და სტადიის ზუსტი განსაზღვრა და ყოველი პაციენტისთვის შეირჩეს ინდივიდუალური მკურნალობა. ლუნდის უნივერსიტეტის პროფესორმა ზაალ კოკაიამ და ექიმ-ონკოლოგმა ნათია ცაბუტაშვილმა გადაწყვიტეს სწორედ ამ ტიპის დიაგნოსტიკურ პრინციპებზე დაფუძნებული მრავალპროფილური კომპანიის დაარსება საქართველოში, რომელიც მათ ბევრი საინტერესო და ახალი იდეის განხორციელების საშუალებას მისცემდა, თუმცა, როდესაც 2019 წლის შემოდგომაზე კომპანია „მედ-დიაგნოსტიკა“ დაარეგისტრირეს, ვერავინ იფიქრებდა, რომ სულ რამდენიმე თვეში COVID-19 ძირფესვიანად არევდა მათ გეგმებს.

ზაზას და ნათიას თავიდანვე სურდათ, შეექმნათ თანამედროვე დიაგნოსტიკური კომპანია, რომელიც გააერთიანებდა ბიზნესს, მეცნიერებასა და განათლებას. კომპანიას მჭიდრო კავშირი უნდა ჰქონოდა აკადემიურ სივრცესთან და, ბიზნესის პარალელურად, კომპანიის ტექნოლოგიური ინფრასტრუქტურისა და ინტელექტუალური ექსპერტიზის გამოყენებით აქტიურად ჩართულიყო კვლევით პროექტებსა და საგანმანათლებლო პროცესში. არჩევანი შეჩერდა აკადემიურ „სპინოფ“ კომპანიის მოდელზე, რომელიც კარგადაა აპრობირებული დასავლეთში. ამ ტიპის კომპანია იქმნება საგანმანათლებლო ან კვლევითი დაწესებულების მხარდაჭერითა და თანამონაწილეობით იმ ცოდნისა და გამოგონებების კომერციალიზაციისთვის, რომლებიც აკადემიურ სივრცეში არის დაგროვილი.

„მედ-დიაგნოსტიკას“ კომერციული საქმიანობა უნდა ეწარმოებინა მედიცინის ფაკულტეტზე და ხელი შეეწყო სამეცნიერო კვლევების განვითარებისა და სასწავლო პროცესის მაღალტექნოლოგიური ბიოსამედიცინო მეთოდებით გამდიდრებისთვის, მაგრამ როდესაც ახლად დაფუძნებული ლაბორატორია პირველ ნაბიჯებს დგამდა და სივრცის კეთილმოწყობითა და აღჭურვით იყო დაკავებული, პანდემიამ ყველაფერი თავდაყირა დააყენა და ყველა გეგმა ჩაშალა.

კომპანია უეცრად დადგა ახალი გამოწვევების წინაშე. თბილისის სახელმწიფო უნივერსიტეტის მხარდაჭერითა და ზაზას, ნათიას და მათი გუნდის უდიდესი ძალისხმევით „მედ-დიაგნოსტიკამ“ უმოკლეს ვადაში შეძლო, ქვეყანაში არსებული ეპიდმდგომარეობის და დიაგნოსტიკური მოთხოვნილებების გათვალისწინებით, სრულად გადართულიყო COVID-19 ინფექციის დიაგნოსტირებაზე. დღეს კომპანიაში მუშაობს 15 თანამშრომელი, გადამზადდა და დასაქმდა თბილისის სახელმწიფო უნივერსიტეტის 12 სტუდენტი. შედეგად, დაავადებათა კონტროლისა და საზოგადოებრივი ჯანმრთელობის ეროვნულ ცენტრთან მჭიდრო თანამშრომლობით, ტარდება COVID-ინფექციის ტესტირება 4 PCR დანადგარით, რომელთა საერთო პოტენციური სიმძლავრე დღეში 1000 ტესტამდეა.