პეპლები ერთ-ერთი ულამაზესი და მრავალრიცხოვანი ჯგუფია ცხოველთა სამყაროში. მათი ფრთები დაფარულია სხვადასხვა ფორმისა და აგებულების პატარა ქერცლებით, რომელთა პრიზმაში სინათლის სხივის გავლით მიიღება ის ფერთა გამა, რომლითაც ასე ლამაზად არის მოხატული მათი ფრთები. პეპლების ევოლუციური ისტორიის კვლევა გართულებულია ნამარხი ნიმუშების სიმცირის გამო, თუმცა, სავარაუდოდ, პეპლების პირველი, პრიმიტიული წარმომადგენლები 140 მილიონი წლის წინ გამოჩნდნენ. მოლუკულური ბიოლოგიის კვლევების შედეგად კი დადგინდა, რომ პეპლების ნიმფალიდისებრთა ოჯახი 90 მილიონი წლის წინ წარმოიშვა და მრავალ კატასტროფას გაუძლო.

მორფა დიდიუსი – Morpho didius

ფარშავანგთვალა ატლასი – Attacus atlas

მოხატული ვეისკი – Graphium weisk

დღეისთვის, მსოფლიოში პეპლების 200 000-ზე მეტ სახეობას ითვლიან, კავკასიაში 20 000-მდე სახეობაა აღრიცხული, საქართველოში – 15 000-ს აჭარბებს, ხოლო მათგან 2500 სახეობამდე საქართველოს ეროვნული მუზეუმის ზოოლოგიურ ფონდშია დაცული. ფონდის კურატორი და აღიარებული მკვლევარი ქალბატონი ეთერ დიდმანიძე, თითქმის 60 წელია უვლის პეპლების უნიკალურ კოლექციას, რომლის ისტორიაც კავკასიის მუზეუმის დაარსებიდან იწყება; როდესაც 1857 წელს, შტაბს-კაპიტანმა, თავადმა აბელ მელიქოვმა (მელიქიშვილი) ახალდაარსებულ კავკასიის მუზეუმს საჩუქრად გადასცა პეპლების კოლექციის 5 ყუთი (100-მდე სახეობა). მუზეუმის პეპლების კოლექცია, მას შემდეგ იზრდება და დღეს ეგზემპლარების რაოდენობამ 30 000-ს მიაღწია, მათ შორისაა წითელ წიგნებსა და ნუსხებში შეტანილი სახეობები თუ მეცნიერებისთვის ახალ სახეობათა და ქვესახეობათა ტიპები.

ლიმონა – Gonopteryx rhamni

ცისფერი მერცხალკუდა – Papilio blumei

ხავერდულა კალიგო – Caligo oileus

ეთერ დიდმანიძის მიერ პირველად აღწერილი სახეობისა და ქვესახეობების ჩამოთვლა შორს წაგვიყვანს, ამიტომ მის ჯერჯერობით ბოლო აღმოჩენას, დიდმანიძის მერქანჭამიას (Holcocerus didmanidzae) დავასახელებ. ეს სახეობა იმითაცაა გამორჩეული, რომ უძველეს ოჯახს მიეკუთვნება, მხოლოდ ვაშლოვანის ნაკრძალის არიდულ ტყეში ბინადრობს და მისი რიცხვი კრიტიკულად მცირეა.

ფრთაფრინველა პეგასი – Orthoptera pegasi

ფარშავანგთვალა არტემისი – Actias artemis

ავრორა – Anthocharis cardamines

დარწმუნებული ვარ პეპლების ფონდს კიდევ არაერთი საინტერესო ეგზემპლარი შეემატება, თუმცა, მას დღეს უკვე აქვს უდიდესი მეცნიერული მნიშვნელობა კავკასიის ფაუნის გასაცნობად და წარმოადგენს კიდეც უცხოელ მკვლევართა და ახალგაზრდა თაობის მეცნიერთა დიდი ინტერესის საგანს.