National Geographic – საქართველოს პირველი ნომერი 2012 წლის ოქტომბერში გამოვიდა. 12 ოქტომბერს, ჟურნალმა ათი წლის იუბილე აღნიშნა. ჟურნალი პირველი დღიდან კომპანია სილქნეტის მხარდაჭერით გამოიცემა და მისი ძირითადი მიზანია საზოგადოების ცნობიერების ამაღლება საბუნებისმეტყველო, ისტორიული თუ სოციალური და ეკონომიკური მეცნიერებების, აგრეთვე ტექნოლოგიების სფეროებში.
საიუბილეო ღონისძიებას დაესწრო National Geographic Partners-ის ვიცე-პრეზიდენტი, საერთაშორისო მედიისა და ბიზნესის დეპარტამენტის ხელმძღვანელი იულია ბოილი, რომელიც საქართველოს ამ თარიღის აღსანიშნად ეწვია . “2012 წელს, მე ჩემს გუნდთან ერთად აქტიურად ვიყავი ჩართული National Geographic – საქართველოს დაარსებაში. ამიტომაც, ეს თარიღი ჩემთვის განსაკუთრებით მნიშვნელოვანია. დიდი მადლობა მინდა გადავუხადო გიორგი რამიშვილს და მთელ მის გუნდს ჟურნალის უწყვეტი მხარდაჭერისთვის. ასევე, მადლობას ვუხდით დავით ლორთქიფანიძეს საქართველოში National Geographic-ის საქმიანობის გვერდში დგომისთვის და ვულოცავთ National Geographic Magazine (NGM) – საქართველოს შეუდარებელ და ღირსეულ მთავარ რედაქტორს, ნათია ხულუზაურს და შეუპოვარსა და ინიციატივიან გამომცემელს, ანი ციბაძეს, ჟურნალის ქართული გამოცემის 10 წლის იუბილეს“. – იულია ბოილი, National Geographic Partners-ის ვიცე-პრეზიდენტი.
ღონისძიებას დაესწრო საქართველოს პრეზიდენტი სალომე ზურაბიშვილი, ა.შ.შ.-ის ელჩი საქართველოში კელი დეგნანი. ასევე – დიპლომატიური კორპუსის სხვა წარმომადგენლები, ხელოვანები, მწერლები, ფოტოგრაფები და სხვ.
„ჩვენთვის დიდი პატივია, რომ მსოფლიო მედიაინდუსტრიის ერთ-ერთი ყველაზე გავლენიანი ბრენდი – National Geographic-ი შემოვიყვანეთ საქართველოში და უკვე 10 წელია ეს სამეცნიერო-პოპულარული ჟურნალი ქართულ ენაზე გამოიცემა. ამ პროექტს თავიდანვე განვიხილავდით, როგორც გრძელვადიან ინვესტიციას განათლებაში და არა მოგებაზე გათვლილ კომერციულ წამოწყებას. მჯერა, რომ National Geographic-ის ქართუთლენოვანი გამოცემა კიდევ ერთი ნაბიჯია საქართველოს ნათელი მომავლისკენ, კიდევ ერთი აგურია, რომელიც ხელს უწყობს საქართველოს ინტეგრაციას მსოფლიოს კულტურის, განათლებისა და მეცნიერების ერთიან სივრცეში”. – აღნიშნა გიორგი რამიშვილმა, National Geographic – საქართველოს დამფუძნებელმა.
National Geographic – საქართველო იუბილეს ტრადიციულად ქართული ყდითა და მთავარი თემით შეხვდა.
“უკვე მე-6 წელია ჩვენ დაბადების დღეს ქართული ყდითა და მთავარი თემით ვხვდებით და ვცდილობთ, რომ მაქსიმალურად მრავალფეროვანი და საინტერესო ქართული მასალა შევთავაზოთ მკითხველს. ამჯერადაც ძალიან ვეცადეთ, რომ 10 წლის იუბილე ღირსეულად აღგვენიშნა. მინდა განსაკუთრებული მადლობა გადავუხადო ჩვენს ერთგულ მკითხველს და იმედი ვიქონიო, რომ შევძლებთ მათი იმედები მომავალშიც გავამართლოთ“. – ნათია ხულუზაური, National Geographic – საქართველოს მთავარი რედაქტორი.
„10 წელი საქართველოში ბეჭდური მედიის არსებობისთვის ნამდვილად არ არის ცოტა, მით უმეტეს იმ პირობებში, როდესაც თანამედროვე ტექნოლოგიებმა და ინტერნეტიზაციამ მრავალი გამოწვევის წინაშე დააყენა მსოფლიო ბეჭდური მედია. ბოლო დროის, ალბათ, ყველაზე რთულ პერიოდში, პანდემიის დროს, კიდევ ერთხელ გახდა ნათელი, თუ რამხელა ძალა და მნიშვნელობა აქვს მეცნიერებას, კვლევას და სანდო ინფორმაციის მიწოდებას საზოგადოებისთვის – იმას, რასაც National Geographic-ი მთელი თავისი არსებობის მანძილზე ემსახურება. ანი ცაბაძე, National Geographic – საქართველოს გამომცემელი და დირექტორი.
———————
National Geographic-ი მსოფიოში ერთ-ერთი ყველაზე ცნობილი ჟურნალია, რომელიც 1888 წლიდან გამოდის. ის იბეჭდება 26 ენაზე და 100-ზე მეტ ქვეყანაში ვრცელდება. National Geographic-ს მსოფლიო მასშტაბით დაახლოებით 100 მილიონი მკითხველი ჰყავს.
ქართულენოვანი ჟურნალის პირველი ნომერი 2012 წლის ოქტომბერში გამოვიდა. მსოფლიოში ერთ-ერთი ყველაზე ცნობოლი ბრენდის საქართველოში შემომყვანი და ქართულენოვანი გამოცემის მხარდამჭერი კომპანია „სილქნეტია“.
მედია ჩვენს შესახებ:
- National Geographic Society-ს ვიცე-პრეზიდენტი იულია ბოილი Euronews Georgia-ს ეთერში
- კელი დეგნანი National Geographic საქართველოს შესახებ
- ნათია ხულუზაური BMG- ის ეთერში
- Euronews Georgia 10 წლის იუბილესთან დაკავშირებით (53:29)
- Euronews Georgia 10 წლის იუბილესთან დაკავშირებით
- ანი ცაბაძე Euronews Georgia -ს ეთერში