National Geographic-ის ფოტოები საოცრად მრავალშრიანია, სწორედ ამაშია მათი ჯადოსნურობა. თითოეულ ფოტოს ცნობისმოყვარეობის აღძვრა ან კოლექტიური ცნობიერების შეცვლა შეუძლია. ამას ბავშვობიდან ვგრძნობდი, როდესაც აიოვის შტატში მცხოვრები პატარა გოგონა ვიყავი და National Geographic-ის ნომრებს სკოლის ბიბლიოთეკაში ვათვალიერებდი. ახლაც თვალწინ მიდგას ტუტანხამონის ოქროს ნიღბის სახელგანთქმული გამოსახულება, 1977 წლის მარტის ნომრის გარეკანს რომ ამშვენებს. ეს ფოტო ძველ სამეფოში სამოგზაუროდ გვეპატიჟება და წარმოსახვას არქეოლოგიური აღმოჩენების ბრწყინვალებით იტაცებს.
National Geographic-ის პირველი ფოტო საზოგადოებისა და ჟურნალის დაარსებიდან ერთ წელიწადში – 1889 წელს – გამოქვეყნდა. უდიდესი პატივია, რომ ამ საზოგადოების ხელმძღვანელობა მხვდა წილად და უკვე ერთი წელია, რაც მის მდიდარ ტრადიციას ვაგრძელებ.
დღეს National Geographic Society დამოუკიდებელი მთხრობელების ერთ-ერთი უმსხვილესი დამფინანსებელია მსოფლიოში და მისი ფურცლები ხშირად ეთმობა იმ გულწრფელ და შთამბეჭდავ ფოტოებს, რომლებიც შლის საზღვრებს, გვიღვიძებს თანაგრძნობას და აჩქარებს ცვლილებებს. მათ შორისაა: სტივენ უილქსის „დროშების ველი“, რომელიც COVID-19-ის უმძიმეს შედეგებს ასახავს, თუ თომას პეშაკის ანტარქტიკის საზღვაო ცხოვრება, პლანეტის საგანგაშო საფრთხეს რომ გვახსენებს.
ჩვენ ერთი მისია გვამოძრავებს: გავაშუქოთ და დავიცვათ დედამიწის საოცრებანი. ამას მსოფლიოს ყველა კუთხის ნიჭიერი მეცნიერების, მთხრობელების და განათლების სფეროში მოღვაწეთა დაფინანსებითა თუ მხარდაჭერით ვცდილობთ. ისინი ავრცელებენ ცოდნას და იცავენ ველურ ბუნებას, აღბეჭდავენ საფრთხეებს, რომლებიც პლანეტას ემუქრება და მომავალ თაობას მათთან საბრძოლველად ამზადებენ.
გვჯერა, რომ მკვლევრებთან თანამშრომლობით მრავალ მნიშვნელოვან ცვლილებას დავაჩქარებთ. National Geographic Society-ს ახალი სტრატეგიული გეგმის მიხედვით ჩვენი ყურადღება ხუთ მთავარ მიმართულებას უნდა მივაპყროთ: მიწა, ოკეანე, ველური ბუნება, გამომგონებლობა და კაცობრიობის ისტორია და კულტურები. მეტ ყურადღებას დავუთმობთ კვლევის ისეთ ინსტრუმენტს, როგორიც ფოტოგრაფიაა და მკვლევრების, პარტნიორების, დონორების და ჩვენი მისიის სხვა გულშემატკივრების თანამშრომლობას კიდევ უფრო გავამარტივებთ.
ერთ ფოტოს – ფარაონის ნიღაბი იქნება თუ პინგვინი ანტარქტიკის უთოვლო მიწაზე – შეუძლია სამუდამოდ დაგვამახსოვროს თავი. მას შეუძლია ცვლილება დააჩქაროს და ისტორიაზე იმოქმედოს. National Geographic-ი მზადაა დედამიწის დაუვიწყარი სცენები ამ საუკუნეშიც აღბეჭდოს… და მომავალშიც.
ჯილ ტიფენთალერი, National Geographic Society-ს გენერალური დირექტორი
ილუსტრაცია: ჯო მაკკენდრი